Umdas iti bulto dagiti family food packs a nakadeploy para ditoy Northern Luzon a mabalin a maaramat kadagiti relief operations apaman a kumaro pay ti epekto dagiti panagtudo, segun iti Department of Social Welfare and Development (DSWD).
Kinuna ni DSWD Spokesperson Irene Dumlao nga awan iti rumbeng a pagdanagan dagiti residente a maapektaran ken kasapulan a maibakwit.
Iti agdama ket awan pay met ti nailista ti local social welfare office a nakaro a naapektaran ti dakes a kasasaad ti paniempo ngem agtaltalinaed da a nakabantay ti posible nga epekto ti bagyo ken habagat.
Banbantayan pay ti DSWD dagiti lokal a gobierno a posible a kumiddaw ti kanayunan a relief packs apaman nga agkurang ti iggem da a supply.
Adda ita ti nakasagana a nasurok tallo a milyon nga family food packs iti naka-preposisyon kadagiti nagduduma a paset ti pagilian a mabalin a mausar ti aniaman nga oras. Silulukat payen ti dagiti lokal nga opisina ti DSWD tapno umalalay kadagiti lokal a gobierno a mangipatulod kadagiti agkasapulan agingga kadagiti geographically-isolated areas (GIDA).
