LA UNION – Palubusan iti Commission on Election (COMELEC) dagiti poll watchers nga ag-Facebook (FB) live wenno i-video iti mapaspasamak a binnilangan ti botos iti uneg ti presinto inton Barangay and Sangguniang Kabataan (SK) election.
Iti pannakiuman ti Bombo Radyo kenni La Union Election Supervisor Atty. Joel Gines, kinunana a mabalin nga ag-video kadagiti poll watchers basta saan a makasinga iti electoral board wenno iti agpapaay kas taga-bilang kadagiti botos.
Ngem ipawpawil met ti COMELEC nga alaan ti video wenno ladawan dagiti botante nga agsursurat iti balota wenno madama nga agbutbotos iti uneg ti polling precint.
Innayon pay ti election supervisor a kasapulan a suruten dagiti ipatpatungpal a pagannurutan ti komisyon tapno maipanamnama nga agbalin a naannayas ti eleksyon pambarangay.
