LA UNION – Binabalaw da Barangay Chairman Aubrey Reyman San Diego ken Barangay Kagawad Maribeth Gail Alegre ti Barangay One, San Fernando City, La Union iti video a nai-post iti maysa a local social media platform ditoy siyudad.
Iti ngamin nasao a video ket naglaun iti pannakairaman iti dua a menor de edad iti napasamak a pammugbog idi Enero 26, 2022 agarop alas 4:00 ti malem iti Barangay 1, San Fernando City.
Base iti report, iti biktima ti pammugbog ket maysa a 15-anyos a barito, taga Bauang, La Union bayat a dagiti suspek ket maysa a 15-anyos a barito ken 21-anyos a baro, agpada a residente ti Barangay One.
Base pay iti impormasyon, napan nagpasyar ti biktima iti nobyana, idi a maipagarop a kinursunada wenno dinangran daytoy dagiti suspek, ken naamwan a ti maysa a suspek ket ex-boyfriend iti nobya ita ti biktima.
Iti agdama, agtultuloy iti panangimbestigar ni Kapitan San Diego nu siasino iti nangala ken nang-upload iti video, a nai-post met iti Damdamag Ilocano, banag a saan a maiparbeng gaputa adda karaman a menor de edad ken mabilang daytoy a ‘damaging’, nangruna ket nangparnuay daytoy ti buteng kadagiti menor de edad.
Mangnamnama dagiti barangay officials a saanen a maulit ti nasao nga insidente.
Mainaig ti daytoy, binalakadan ni Barangay Kagawad Maribeth Gail Alegre iti amin, nangruna ti nadakamat a social media platform nga agbalin a responsable iti panangusar ti social media network, tapno saan a makadadael iti pada a tao.
