Natakuatan ti Federal Bureau of Investigation (FBI) ken U.S. Department of Justice ti China-linked hacking operation a maipagarup a nangpuntiria iti sumagmamano a kritikal nga imprastruktura ken ahensia ti gobierno idiay Estados Unidos.
Segun kadagiti autoridad ti U.S., nangisayangkat iti court-authorized seizures kadagiti domains nga us-usaren ti dua nga hacking platforms a QScan ken QTRouter, a nainaig iti China-linked group a QTFY. Gapu ta napateg dagiti domain iti panagandar ti malware, saanen a mausar dagiti dua a platform kalpasan iti panagkumpiskar.
Segun iti FBI, naisilpo ti QTFY iti Nanjing Xinjiuwei Network Technology Company idiay China, ken maipagarup a mangidiaydiaya ti hacking services kadagiti kliyente a pakairamanan ti Chinese Ministry of State Security ken People’s Liberation Army.
Karaman kadagiti target ti operasion iti National Aeronautics and Space Administration (NASA), Federal Reserve, Department of Energy, Department of Justice, Department of Health and Human Services, National Institutes of Health ken U.S. Senate. Mapapati pay a natarget dagiti kompania ti koriente, telecommunications providers, sistema ti ospital ken dadduma pay a kritikal nga imprastruktura.
Agus-usar ti QTFY dagiti nakompromiso nga internet-connected devices iti nasurok a 130 a pagilian tapno mailemmeng iti pudno a pagtataudan dagiti cyberattack. Kinuna ti ahensia a nangrugi iti aktibidad ti grupo idi 2018.
Kabayatanna, inlibak ti Chinese Embassy idiay Washington dagiti alegasion, ken kenunana a nainget a konkontraen ken lablabanan ti China dagiti amin a kita ti cyberattack.###
