LA UNION – Aminado ni Bombo International Correspondent Dominic Viloria idiay Texas, a pudno a nabara ita ti eleksiyon idiay Amerika kumpara iti napal-palabas.
Ngem nupay kasta, kontrolado pay met kunana ti sitwasyon sadiay.
Nangrugin kunana iti pormal a panagbotos dagiti umili ita nga aldaw, Nobyembre 3, malaksid dagiti naisayangkat nga early voting.
Iti eksklusibo a pannaki-uman ti Bombo Radyo La Union kenni BINC Viloria, kinuna na a ti Texas ket maysa a Republican state wenno balwarte ni Republican Pres. Donald Trump.
Ngem iti kapaliiwan na, adu a botante ken umili sadiay iti bimmaliktad gapu kadagiti naduma-duma nga isyu a saan da a nagustuanan iti panangimanehar ni Trump.
Maysa ditoyen kunana iti panangimanehar ni Trump iti COVID 19, a nangapektar pay iti ekonomiya ti nasao nga estado.
Pinagkumpara na pay da Trump ken Biden. Ni Trump kunana ket agsasabali iti ibagbaga na idinto a ni Biden ket straight forward ken consistent kadagiti waragawag na.
