Pa-paimbestigaran ni Senador Risa Hontiveros iti Senado ti naipadamag a kaso dagiti Filipinas a naisalakan idiay Cambodia a nagbalin a “baby-makers” wenno surrogate mothers.
Iti Senate Resolution 1211 nga inpila ni Hontiveros, ibilinna iti Senate Committee on Women, Children, Family Relations and Gender Equality nga idadauluanna a kitaenda daytoy a kaso ti human trafficking kadagiti Pilipino iti ballasiw-taaw a paset ti infant trafficking scheme.
Agarup 20 a Filipinas ti narescue dagiti polis ti Cambodia iti probinsia ti Kandal a maar-aramat iti surrogacy wenno panagsikog iti anak ti sabali.
Iti daytoy a bilang, 13 ti masikog itan idinto a pito ti naituding a maisubli ditoy Pilipinas.
Dagiti Filipina ti marekrekrut online ken kaaduan kadakuada ti ammodan no ania ti trabaho nga aramidenda iti ballasiw-taaw.
Immuna met a nagballaag ti Department of Foreign Affairs (DFA) maipapan iti baro a human trafficking scheme a pumunpuntiria itan dagiti Pilipino.
