LA UNION – Maragsakan ti Filipina domestic helper a ni Joan Pabona idi a maawatna ti 1st issue ti National Geographic Magazine ken ti napangabakanna a premyo kas second placer iti photo contest nga inorganisa ti nasao a kompanya idiay Hongkong (HK).
Iti pannakiuman ti Bombo Radyo La Union kenni Joan, kinunana a saan a daytoy iti immuna a gundaway a nangabak isuna kadagiti photo contest idiay abroad.
Iti nasao a pasalip ket nangabak isuna ti HK$6,500 wenno kaibatugan iti P43, 000 kas premyo ken malaksid pay iti 12 issues ti National Geographic Magazine.
Maysa a black-and-white a litrato nga addaan ti tema a “Sacrifice” ti nangabak nga entry daytoy.
Gapu ta silulukat iti amin nga agtartarigagay a makisalip iti photo contest sadiay ken makipaset manen daytoy tapno mapadur-as ti kabaelanna iti panangaramid ti tema wenno istorya nga adda iti likudan dagiti litrato.
Sigun pay ti Filipina worker, stress reliever ken hobby-na ti photography.
Iti panangala kadagiti naduma-duma a ladawanna nga ipappapas ti gundaway tunggal makarikna daytoy iti iliw a makadinna ti pamilya.
Kayat met ni Pabona iti agbalin a professional photographer gapu ta adda met ti mangidiay-diaya kenkuana, ngem kasapulanna pay nga agadal ti photography tapno isaganaan ti nasao a karera.
Ni Joan Pabona ket tubo iti ili ti Sudipen, La Union ken naikamang daytoy idiay probinsya ti Ilocos Sur. (Absalom Flores)
