LA UNION – Mangnamnama dagiti kakabagyan ti lifeguard idiay Kingdon of Saudi Arabia (KSA) ni Jonhy Fernandez a makaawid daytoy iti kabiitan a panawen idiay pagtaenganda idiay ili ti Agoo, La Union.
Saan a makaawid ti nadakamat a mister gapu ta dimmakel ti utang daytoy kalpasan a maipagarup nga allilawen ti co-maker na.
Iti pannakiuman ti Bombo Radyo iti anak ni Jonhy a ni Janica Fernandez, kinunana a dua a tawenen nga awan ti tabaho ti amana nga adda ita idiay bahay kalinga idiay KSA.
Sigun kenni Janica, bulsek ti maysa a mata ti amana gapu ti katarata.
Iti palawag ni Janica, iti ammoda ket bassit laengen iti utang ti amada nga umabot iti P14,000 ngem nakillat dagitoy gapu ta dimmanon metten iti P80,000 ti nasken a bayadanna sadiay.
Regular met kinunana nga agbaybayad ni Jonhy babaen ti nasao a co-maker, ngem saan met gayam nga agrim-remit daytoy iti kwarta.
Sigun kenni Janica, binalakadan isuda ti OWWA a kasapulan abayadan ni Johny ti nasao nga utang daytoy tapno makaawid ditoy pagilyan ngem saan a kabaelan ti pamilyada a bayadan ti nasao a kantidad.
Kabayatanna, nagpaarayaten ti pamilya Fernandez iti lokal a gobyerno ti Agoo, La Union.
