Pinasingkedan ti Department of Foreign Affairs (DFA) a maysa a Filipino seaferer ti nasentensyaan ti 18 a tawen a pannakaibalud idiay Ireland gapo iti pannakairaman na ti smuggling iti dakkel a gatad ti cocaine idi tawen 2023.
Segun iti report, ti nasao a Pilipino ken pito pay nga indibidwal ket sinentensyaan ti Irish Special Criminal Court kasaruno ti gandat nga ipuslit ti 2.2 a tonelada nga cocaine nga aggatad ti €157-M wenno nasurok-kumurang P9.7 billion idiay Ireland.
Kinuna ni DFA Undersecretary Eduardo De Vega a ti orihinal a sentensya ket 28 a tawen ngem napababa laeng iti sangapulo a tawen gapo iti nasayaat a galad ti Pilipino a saan nan a dinakamat pay ti pakabigbigan na.
Daitoyen iti maikadua a kangatuan a pannusa kasaruno ti maysa a Dutch national a nasentensyaan ti 20 a tawen a pannakaibalud.
Segun kenni De Vega, agtultuloy met iti panangipaay ti consular assistance ti embahada ti Pilipinas idiay Dublin ken pannakikoordinar na iti abogado ti Pilipino para kadagiti sumarsaruno pay a legal nga addang.
Dagiti nasentensyaan ket puro amin tripulante ti MV Matthew, maysa a Panamanian-flagged cargo ship a natiliw ti Irish Army Rangers idi Setyembre 2023.
Naggapo iti barko idiay Curaçao, Venezuela ken naharang idi ginandat da nga ipuslit ti droga iti Irish territorial waters. Daitoy metten iti kadakkelan a drug bust para ti pakasaritaan ti pagilian nga Ireland.
Kabayatanna, innem pay a tripulante ti MV Matthew ti nasentensyaan met manipud 13.5 agingga 17.5 a tawen a pannakaibalud.
