Nangrugin iti panaglakwan dagiti paputok iti nadumaduma a lugar ditoy La Union, partikular idiay Brgy. Bungol, Bacnotan ken Balaoan boundary.
Mangipatungpal iti lokal a gobyerno ken ti pulisya iti inspeksyon kadagiti paputok a mailako, tapno masigurado a sertipikado ken awan ti peligro nga maipaay kadagiti aggatang. Maipangpangruna ti panaglako iti otorisado a lugar ken ti panangtungpal kadagiti ordinansa.
Makita kadagiti pwestoda nga adda ti naka-standby a fire extinguishers tapnu dagus a mausar nu adda ti saan a manamnama nga uram wenno pasamak.
Segun ti maysa nga aglaklako, kumpleto da iti permit manipud LGU ken no maipapan ti presyo awanen ti panagngato ti panaglako da agingga sakbay iti Baro a tawen.
Namnamaen na met nga mapaibos dagiti tagilako da a paputok kas idi napalabas a tawen, nupay manmano pay laeng iti gumatgatang iti agdama.
Dagiti kadawyan a gatgatangen dagiti customers a paputok ket ti:
- Fountain
- 16 shots
- Lusis
- Sinturon ni hudas
-ken nadumaduma pay a klase ti paputok nga aggatad ti 100 pesos agingga 2000 pesos.
Impalagipda kadagiti umili ken customers a saan nga agsigarilyo asideg kadagiti paputok ken maiparit iti mangpadas kadagiti lakoda wenno ti “no testing”.
Kasta met iti agtultuloy a nalinteg ken natalged a panagusar ti paputok, aglalo kadagiti ubbing ken agtutubo a segun ti aglaklako a nasaysayaat no dagiti nataengan laengen iti gumatang ken mangusar.
