LA UNION – Nagserbi a kangrunaan a bisita da First Lady Liza Araneta-Marcos ken mother-in-law na a ni sigud a First Lady Imelda Marcos iti inagurasyon ti newly-renovated ken napnuan pakasaritaan a Marikina Shoe Museum idi Hulyo 8, 2024.
Indaulwan mismo ni Marikina First District Rep. Maan Teodoro iti panangi-pasyar dagiti agbiyenan iti nasao a museo.
Iti sidong ti panangimaton ni Teodoro, naipatarimaan ken na-upgrade ti shoe museum.
Dita a masarakan iti koleksiyon ti aganay 800 a pares ti sapatos ni sigud a First Lady Imelda Marcos.
Makita pay iti nasao a museo dagiti pares ti sapatos dagiti naglabas a Presidente ti pagilian, senador ken miyembro ti gabinete, malaksid pay dagiti naglabas a mayor ti siyudad ti Marikina ken dadduma pay a nalatak a personalidad.
Maibasar iti waragawag ti lokal a gobyerno, naaramid iti rehabilitasyon ken panang-upgrade iti museo tapno napinpintas pay iti panagpasyar dagiti bisita ken masiguro a maaywanan dagiti napapateg nga artifact para iti sumarsaruno nga henerasyon.
Nagturong pay da First Lady Liza ken sigud a First Lady Imelda iti shoe exhibit dagiti 15 a shoe manufacturers iti kaabay ti museo a Shoe Museum Park.
