BR LA UNION – Siniguro ti Palasyo ti Malacañang nga adda iti nasayaat a kondisyon ni First Lady Liza Araneta Marcos laksid ti pannakairaman na iti pannakatay ti negosyante a ni Paolo Tantoco.
Segun kenni Palace Press Officer Claire Castro, ammo kunana ti First Lady iti kinapudno iti likudan ti isyu.
Kinuna na pay, a saan a kayat koman a padackelan pay ti First Lady iti isyu agsipudta naka-pokus ti administrasyon iti panangipakita iti publiko ti panagtrabaho ti Presidente ken pudno a serbisyo para iti ili.
Impaganetget ti Palasyo, nga awan ti pakariribokan ti First Lady agsipudta makita met iti record ti kinapudno ken mangipaneknek nga awan ti basaran dagiti akusasyon.
Iti rumbeng kunana nga agdanag ken maamak ket dagiti tattao nga agtultuloy nga agiwar-waras ti biddut nga impormasyon tapno dadaelen iti Presidente ken iti administrasyon.
Kabayatanna, ad-adalen ita ti gobyerno iti posible a legal nga aksyon kontra kadagiti adda ti likod ti peke a police report a nagwaras online.
Segun kenni Castro, naipan-panawen iti panangidatag ti kaso agsipudta saan a rumbeng a bay-an nga agpannuray ti kina-ulbod, nangruna nu aggapo daytoy iti sumagmamano a kameng ti media a mabalin a pattien ti publiko ken mangparnuay ti biddut nga impresyon.
Tinakderan ti Palasyo a saan a marebba ti agdama nga administrasyon laksid dagiti nasao a taktika ti panangperdi wenno pammadakes.
