Nakagun-od ti minor damage ti barko ti Philippine Coast Guard (PCG) a BRP Suluan idi masagid ti Chinese Navy warship a timmama met iti kadwa na a China Coast Guard asideg idiay Scarborough shoal idi Agosto 11.
Nupay nakuppit iti flagpole ti barko ti Pilipinas, natalged met amin a crews a sakay na kalpasan ti insidente.
Napasamak iti panagdinnungpar dagiti barko ti China idi kangitingitan ti misyon ti PCG ken Bureau of Fisheries and Aquatic Resources (BFAR) tapno mangiwaras ti ayuda para kadagiti mangngalap a Pilipino idiay Scarborough Shoal a paset ti Kadiwa Para sa Bagong Bayaning Mangingisda (KBBM) initiative.
Segun kenni PCG spokesperson for the WPS Commodore Jay Tarriela, nakapanawen idiay Scarborough shoal ti BRP Suluan bayat a nagtalinaed met iti posisyon ti BRP Teresa Magbanua.
Idi aldaw ti Lunes, impaganetget ni Presidente Ferdinand Marcos Junior a saan a pulos nga umatras dagiti barko ti Pilipinas iti laban ken impannakkel a natutured amin a Pilipino.
Innayon pay ti Presidente nga ar-aramiden metlaeng dagiti uniformed personnel ti pagilian iti mandato ken misyon da a depensaan ti Pilipinas ken saan da metlaeng a pulos nga agsardeng nga aramiden daitoy.
