LA UNION – Nainget ti panangkontra dagiti residente ti ili a San Juan, La Union iti pannakaipatungpal ti flood control project idiay Taboc River ti nasao nga ili.
Gaputi dayta ket maysa a petisyon iti naaramid ken pinirmaan dagiti maseknan a residente iti tallo a barangay a kangrunaan nga apektado iti nasao a proyekto ti gobyerno.
Kabilang ditoy iti Barangay Taboc, Talogtog, ken Ili Norte.
Iti eksklusibo a pannakiuman ti Bombo Radyo La Union kenni Tina Antonio, maysa a residente ti ili a San Juan, imbinsa-binsa na dagiti saan a nasayaat nga epekto iti proyekto a kas iti pannaka-apektar iti supply ti danum ti intero nga ili, pannaka-apektar ti pagbiagan dagiti agkalkalap ti lames iti Taboc river, ken malay-layos itan dagiti lugar a sigud a saan met a malay-layos.
Gaputi dayta, tarigagay da nga i-rekonsidera ti gobyerno kangrunaan na iti DPWH a mangipat-patungpal ti nasao a proyekto.
Manaig daytoy ket naisayangkat ti ocular inspection iti nasao a proyekto, babaen kadagiti local officials nga indaulwan ni Provincial Board Member Abraham Rimando, kas chairman ti Committee on Environment Human Ecology and Security, kadwa dagiti kameng ti DENR, PENRO, DPWH, ken dagiti maseknan a residente iti 3 a barangay.
Kinuna iti Bombo Radyo La Union ni Bokal Rimando a kalpasan ti naisayangkat nga inspection ket nakatuding nga agtataripnong iti Provincial Board, tapno adalen a naimbag nu nasken nga ipursige wenno isardeng iti operasyon ti nasao a proyekto.
