LA UNION – Nadundunor iti maysa a motorcyle rider kalpasan a nadungpar ti kotse iti manmanehuen na a motorsiklo, iti kawatiwatan ti national highway a sakop ti Barangay Paringao, Bauang, La Union agarop alas 2:30 idi malem, December 10.
Iti biktima ket managan Jomar Sante, 20-anyos, baro, maysa a food chain crew, ken residente ti Barangay Natividad, Naguilian, La Union.
Maibasar iti report ti pulisiya idiay ili ti Bauang, napaspas iti panagmaneho ni Sante nga agturong iti abagatan a direksiyon ket saan na a napakadaan iti panagsikko ti kotse a minaneho ti managan Teogenes Sanchez, 66-anyos, maysa nga Electrical Engineer, holder ti International Driver’s License, ken residente ti Barangay Paringao ti nasao nga ili.
Kas resulta, naidungpar ti motorsiklo iti sango a paset ti kotse ket agpada a naglak-am ti damages dagiti dua a behikulo.
Naiturong met ni Sante iti Ilocos Training and Regional Medical Center (ITRMC) tapno mataming dagiti sinagrap na a dunor iti bagi kalpasan a naipurwak manipud iti motorsiklo daytoy.
Naamwan a nagsagaba iti pannakablo iti ima ken saka ti biktima.
Kabayatanna, saan met a nadunor iti driver ti kotse ken nagkedked nga agpaisidong iti medical examination.
Naamwan pay nga awan ti imet a driver’s license iti motorcycle rider.
