Agaw-atension iti video ni Senador Ronald “Bato” Dela Rosa kadua iti abogadona a ni Atty. Israelito Torreon iti maipagarup a maysa a mall.
Nadillaw iti kasual a suot ti senador a naka-shorts ken t-shirt laeng, nga adayo iti kadawyan a pormal a kawes ti maysa a mammanday-linteg.
Saan pay nga ammo no sadino ken katno iti nasao a footage a nakagun-od ti nadumaduma a reaksion manipud iti publiko – a nangipeksa ti agpada a suporta ken pammabalaw, karaman iti karit nga agparangen iti senador.
Idi nabiit ket rimuar iti damag a posible a target isuna ti International Criminal Court (ICC) gapu iti akemna iti war on drugs ti napalabas nga administrasyong Duterte.
Kasaruno ti damag a maipagarup nga addaan isunan ti arrest warrant ket saanen daytoyen a dimmardar-ay kadagiti sesion ti senado kas panagannad.#
