Ngimmato ti 4.8 percent agingga iti $6.21 billion iti foreign debt payments ti Pilipinas manipud Enero agingga iti Mayo, manipud iti $5.93 billion iti kapada a panawen idi napalabas a tawen, maibasar iti umuna a datos manipud iti Bangko Sentral ng Pilipinas (BSP).
Kangrunaan a rason ti panagngato iti 13.6 percent a panangngato ti principal payments iti $3.01 bilion, a nasursurok ngem iti panagbaba ti interest payments a 2.3 percent iti $3.2 bilion.
Segun kadagiti ekonomista, naikonektar iti panagngato kadagiti scheduled debt maturities ken saan nga iti panagkapuy ti kabaelan ti pagilian a mangbayad kadagiti obligasion iti ruar.
Innayon da pay nga agtaltalinaed nga umdas iti kabaelan ti pagilian a tungpalen dagiti external obligations gapu iti foreign reserves ken agtultuloy a foreign currency inflows.
Kabayatanna, apagapaman a ngimmato ti outstanding external debt ti pagilian agingga iti $147.35 billion idi ngudo ti Marso, manipud iti $146.74 billion iti makatawen sakbay daytoy.###
