Naituding nga isubmitir ti House prosecution panel ti formal offer of evidence da iti impeachment court sakbay ti naituding a deadline inton bigat, Biernes, Oktubre 23, segun ken ni Batangas Rep. Gerville Luistro.
Kalpasanna, addan 10 nga aldaw ti kampo ni Bise Presidente Sara Duterte a mangisubmitir iti komento wenno panagkedked kadagiti ebidensia nga indatag ti prosekusion.
Karaman kadagiti naiparang nga ebidensia dagiti rekord ti banko, buis, ken korporasion a mainaig kadagiti alegasion a di mailawlawag a kinabaknang maibusor iti Bise Presidente.
Ti pannakaipatulod ti pormal a offer of evidence ket manamnama a mangpatingga iti panangidatag ti prosecution iti ebidensia sakbay ti sumaruno a paset ti impeachment trial.
Inkari pay ni Luistro nga isubmitirna iti Office of the Ombudsman dagiti naurnong nga ebidensia kontra iti Bise Presidente, ken impapilitna a saan a masayang iti laksid ti pannakaikkat ti tallo kadagiti uppat nga artikulo ti impeachment.
Kabayatanna, inlibak ni House impeachment spokesperson Robert Ace Barbers dagiti alegasion a madagdagus ti impeachment trial ni Bise Presidente Sara Duterte sakbay ti naituding a panagbisita ni US President Donald Trump iti Pilipinas tapno tumabuno iti ASEAN summit.
Segun kenni Barbers, maibasar ti bista iti napagnunumuan nga iskediul ti prosecution ken defense kalpasan ti pre-trial conference a napagsasaritaan dagiti saksi ken ebidensia a maiparang. Naituding nga agtultuloy ti bista inton Nobiembre 9 kalpasan a maikkat ti tallo kadagiti uppat nga artikulo ti impeachment.
Pinasingkedan ni Barbers nga awan ti pakainaigan ti bista iti politika ken ti laeng panggepna ket ti panangsungbat kadagiti opisial ti gobierno, idinto nga inlawlawag ni Luistro nga awan ti bilegda a mangpadaras iti proseso ti impeachment trial.
