LA UNION – Karaman kadagiti kimmamat iti deadline ti substitution period ti Commission on Election (COMELEC) a nangipila iti certificate of candidacy ni sigud a San Juan Municipal Councilor Miguel “Migz” Magsaysay tapno agkandidato kas kongresista ti Umuna a Distrito ti La Union kalpasan a nag-withdraw ti kandidatura ni Jimmy Bautista iti sidong ti Labor Party Philippines.
Ni former Councilor Magsaysay ket putot ni sigud a San Juan Municipal Vice-mayor Miko Magsaysay ken apo ni United Senior Citizen Partylist Representative Mila Magsaysay.
Ni Migz ket nag-eskwela iti sekondarya a pagadalan idiay Lorma Colleges Special Science High School sakbay nagbasa ken nagturpos iti Bachelor of Arts in Political Economy idiay University of Asia and the Pacific.
Malaksid iti dayta, naiturposna pay ti Master in Public Administration idiay Philippine Christian University ken nakagun-od iti Certificate manipud ti Asian Institute of Management.
Nangala met ni Migz iti Executive Education wenno nagadal maipapan ti public policy and leadership idiay Harvard University Kennedy School of Government, USA, ken nagbalinna a kaeskwelaan da Jolo Revilla a putot ni Sen. Ramon “Bong” Revilla Jr., ken ni Janella Estrada a putot ni sigud a Sen. Jinggoy Estrada.
Nangrugi iti karerana ti politika kalpasan a nabotosan ken nagtakem daytoy kas Sangguniang Kabataan (SK) chairman ti Barangay Ili Norte, San Juan manipud idi tawen 2010 agingga 20213 sakbay a nagbalin number 1 municipal councilor manipud idi tawen 2010 agingga 2013.
Kabayatan iti panagtakem kas konsehal ti ili ni Migz ket nagbalin met daytoy nga author ken co-author iti 41 ordinances ken 153 resolutions ti San Juan.
Iti agdama, agpapaay isuna kas Chief Executive Office (CEO) ti MCM Group of Companies ken Administrator ti Magsaysay Family Estate.
Iti sabali a bangir, gapu iti panangipila ni Magsaysay ti COC ket makabalubalna a kandidato iti kina-kongresista ti independent candidate a ni sigud a Bacnotan Municipal Councilor Mario Rodriguez, ken ni incumbent Provincial Board Member Paulo Ortega a putot ni incumbent La Union First District Rep. Pablo Ortega.
