BR LA UNION – Pinalubosan ti International Criminal Court (ICC) ni sigud a Presidente Rodrigo Duterte a saan a sumango iti umuna nga status conference para iti panangusig ti kaso na a crimes against humanity inton Mayo 27.
Daytoy ket kalpasan nga indanon ti legal team na iti tribunal a kayat nga i-waive ti sigud a presidente iti karbengan na a sumango.
Iti pito-pinanid a pammilin a napetsaan ti Mayo 22, pinatgan ti ICC Trial Chamber III iti kadawatan ti defense team ni Duterte a saan a dumar-ay ti sigud a presidente iti status conference idiay The Hague.
Segun iti Trial chamber, ingkalintegan ti depensa a ti panang-mandato a sumango ti akusado nga indibidwal iti panagusig ket mabalin laeng nga i-apply iti aktwal a trial ken saan iti status conference.
Inaprubaran met ti tribunal ti nasao a kadawatan ngem nabilin dagiti abogado ni Dutertre nga agsumite ti maysa a written waiver inton Lunes, Mayo 25, a personal a pirmado ti sigud a presidente.
Kabayatanna, kinedkedan ti ICC iti kadawatan ni Atty. Gilbert Andres, maysa kadagiti legal counsel dagiti biktima, a makipaset “remotely” iti status conference.
