Impaganetget ni Bise Presidente Sara Duterte a saan nga aglibas iti amana a ni sigud a Presidente Rodrigo Duterte iti kanito a mapalubusan iti interim release wenno temporario a panakawayawaya.
Iti maysa nga interview idiay pagilian a Kuwait, kenuna ti Bise Presidente a tarigagay ti amana nga agtalinaed laeng idiay Davao City no kaspangarigan palubusan daytoy ti korte. Daytoy ti kanayon a dakdakamaten ti sigud a Presidente tunggal sumarungkar isuna iti ICC detention center idiay The Hague, Netherlands.
Sagudayen ti Rome Statue a mabalin nga agkiddaw ti interim release dagiti nakadetine idiay ICC no masungbatan dagiti nakaituding a kondisyon. Maysa kadagitoy iti kasiguraduan a saan a lappedan wenno butbutngen dagiti testigo.
Kabayatanna, isagsagana metten ti legal team ti sigud a Presidente iti maysa pay a mosyon a saan da pay laeng a naisubmitir ken saan pay nga indetalye ti Bise.
Maisayangkat inton Setyembre 23 iti panagdingeg iti kumpirmasyon ti charges kontra kenni sigud a Presidente Rodrigo Duterte idiay International Criminal Court.###
