Inaprobaran ti Malacañang iti pannakaingato ti fuel discount para kadagiti kualipikado a public utility jeepney (PUJ) ken UV Express drivers manipud ₱10 agingga iti ₱12 kada litro, epektibo inton Agosto 15, maitunos iti direktiba ni Presidente Ferdinand Marcos Jr.
Segun iti Palasio, panggep daytoy a kissayan iti epekto ti nangato a presio ti lana gapu iti tension idiay Middle East.
Imbaga ni Executive Secretary Ralph Recto a manamnama a makaurnong ti tunggal kualipikado a tsuper agingga iti ₱1,800 iti kada lawas iti sidong ti napalawa a fuel discount program.
Daytoy nga addang ket paset ti Unified Package for Livelihoods, Industry, Food, and Transport (UPLIFT), iti whole-of-government response kadagiti suporta a sektor a naapektaran iti panagngato ti presio ti lana.
Kagiddan daytoy, binilin pay ni Recto ti Department of Social Welfare and Development (DSWD) a siguraduen a maited ti UPLIFT Assistance kadagiti mannalon, mangngalap, transportation workers, construction workers, ken dadduma pay nga addaan to nababa a matgedan.
Panggep ti gobierno nga agtultuloy iti panangipaay ti dagus a tulong kadagiti sektor nga ad-adda a maap-apektaran iti panagngato ti presio dagiti produkto a petroleo.###
