Pormal nga inrugi ti Municipal Government ti Agoo ti pannakaiwaras ti fuel subsidy para kadagiti rehistrado a mannalon kas sungbat iti agtultuloy a panagngato ti presio dagiti produkto ti petroleo a nakaro ti epektona iti sektor ti agrikultura.
Nangrugi ti pannakaiwaras idi kalman Abril 6, 2026 iti Mayor’s Conference Hall ti Agoo Municipal Building ken manamnama nga agpaut agingga iti Abril 8, 2026.
Agdagup iti 3,012 a mannalon ti benepisiario ti nadakamat a programa, a panggepna a mapalag-an ti ngumatngato a gastos iti produksion kas iti panagusar iti makinaria, irigasion, ken transportasion dagiti produkto ti agrikultura.
Segun iti lokal a gobierno, napateg ti tulong pinansial tapno masigurado a saan a maitantan ti panagmula ken panagapit dagiti mannalon, nangruna iti baet ti agdama a karit iti ekonomia ken panagngato ti presio dagiti kangrunaan a tagilako.
Daytoy a gannuat ket idauluan da Mayor Frank O. Sibuma ken Deputy Mayor Antonio Eslao, iti pannakitinnulong dagiti kameng ti Sangguniang Bayan. Iti statement da, impaganetgetda ti kinapateg ti dagus a suporta kadagiti mannalon kas kangrunaan a mangipapaay iti suplay ti taraon iti ili.
Tumulong iti naannayas a pannakaipatungpal ti programa ti Municipal Treasurer’s Office iti panangidaulo ni Elena Oribello, a mangimatmaton iti pannakaiwaras ti pondo, ken ti Municipal Agriculture Office babaen ken ni Samuel Villanueva, a mangipasigurado a dagiti benepisiario ket lehitimo a rehistrado a mannalon ken umawat iti umno a suporta.
Naaramid ti panagiwaras iti organisado a wagas, agraman ti panangpaneknek iti kinasiasino dagiti benepisiario ken nasayaat ti pannakaorganisar ti reception schedule tapno maliklikan ti panagpipinnaset ken mataginayon ti urnos iti lugar.
Segun iti LGU, ti programa ti fuel subsidy ket paset ti nalawlawa a panggepda a mangpapigsa iti sektor ti agrikultura, masigurado ti seguridad ti taraon, ken mapatalged ti panagbiag dagiti umili ti Agoo. Manamnama pay a makatulong daytoy a mangtaginayon iti umdas a produksion ti taraon ken malapdan ti posible a panagngato ti presio dagiti produkto ti agrikultura iti lokal a merkado.
Maiparparegta kadagiti benepisiario nga usarenda ti tulong a maawatda iti umno a wagas ken itudingda daytoy iti operasionda iti panagtalon tapno ad-adda a mapaadu ti apit ken matgedan.
Kabayatanna, agtultuloy ti panangipatungpal ti Gobierno Munisipal ti Agoo kadagiti dadduma pay a programa ti agrikultura tapno suportaran dagiti mannalon ken masigurado ti napaut a panagdur-as ti sektor. (Report by Bombo Ericka)
