Iti panagselebrar ti Labor Day ita nga aldaw Mayo 1, naibinglay dagiti napateg a banag maipanggep iti sueldo ken kasasaad dagiti mangmangged.
Iti panakisarita ti Bombo Radyo La Union kenni Board Secretary VI Atty. Romina E. Boado-Cabrillos ti Regional Tripartite Wages and Productivity Board, imbinglayna a tuloy-tuloy ti panangmonitor iti ahensiya ti socio-economic conditions, a pakaigapuan dagiti desisyon maipanggep iti panagngato ti sueldo ti minimum wage.
Segun kenkuana, iti anibersaryo ti panagngato sueldo ti wage order ket inton November 19 agdama a tawen, isu a masapul nga awaten a saan pay mabalin nga agingato ti sueldo.
Nupay kasta, gapu iti agtultuloy a panagngato ti presyo ti petrolyo, nainget ti panangmonitor ti wage board kadagiti socio-economic indicators.
Innayonna pay a saan pay a mabalin a maipakaammo no kaano ti sumaruno a panagngato ti sahod, a nakadepende iti adu a banag, pakairamanan ti produktibidad dagiti trabahador ken ti pakabuklan a kasasaad ti ekonomiya.
Gapuna, impaganetget ni Atty. Romina a ti panangipaay iti umno a sahod ket saan laeng a maibatay iti panggep na a ngumato, no di ket masapul a maikadua iti kinaproduktibo dagiti agtrabaho ken iti kabaelan ti ekonomiya a mangsuporta iti kasta a panagngato.
Kabayatanna, iti mandato ti Regional Tripartite Wages and Productivity Board ket saan laeng a mangikeddeng kadagiti sueldo no di ket tapno maitandudo pay ti produktibidad kadagiti micro, small, ken medium enterprises (MSMEs). Ti panggepna ket mangpaadu iti matgedan dagiti negosio ken mangibinglay kadagiti benepisiona kadagiti trabahador. (Report by Bombo Lorielyn)
