Nagpanawagan ni Senate President Sherwin Gatchalian kadagiti otoridad a siguraduenda a natalged ken naurnos ti pannakatiliw ni Sen. Ronald “Bato” dela Rosa, tapno malapdan ti kinaranggas ken ti posible a pannakapukaw ti biag dagiti sibilyan ken pannakabagi ti linteg.
Iti maysa nga interbyu, kinuna ni Gatchalian a napateg unay a masiguro ti kinatalged ni Dela Rosa ken dagiti law enforcer a mangisayangkat iti operasyon, gaputa napeggad daytoy a kita ti pannakaipatungpal ti linteg.
Impaganetgetna a masapul a naurnos ti pannakaaresto, nangruna kalpasan dagiti statements manipud iti Department of the Interior and Local Government (DILG) a posible nga agtungpal iti kinaranggas ti nasao nga operasyon.
Immunan nga imbaga ni Interior Secretary Jonvic Remulla a mabalin nga umabot iti 10,000 a tattao ti matay nu puwersado a maaresto ni Dela Rosa.
Gapu iti daytoy, imbaga ni Remulla a madama ti pannaki-negosasyon ti gobierno tapno maallukoy ti senador a sumuko.
Nupay kasta, imbaga ni Gatchalian a nasken a takderan ti gobyerno ti otoridadna iti sango ti report nga adda iti armado a grupo a mangipapaay iti proteksiyon kenni Dela Rosa.
Immunan nga imbaga ti Senate President a saan a rumbeng a maki-negosasyon ti gobyerno kadagiti armado a grupo nga awan ti awtorisasyon na nga agiggem ti armas, nangruna nu kabilang da iti grupo a kriminal wenno terorista.
Nupay kasta, inlawlawag ni Gatchalian a saan na nga ammo iti sibubukel a detalye seknan iti grupo a maipagarop a mangprot-protektar iti senador.
Maawatanna met nu apay a saan a mabalin nga ibaga dagiti otoridad iti sumagmamano nga impormasyon gaputi konsiderasyon a pangseguridad.
Maipalagip nga inyanunsiyo ti gobyerno iti P50-milyon a gunguna tapno makatulong iti pannaka-aresto ni Dela Rosa, ken inikkan met ti ultimatum ti Philippine National Police a sumuko ti senador iti makalawas.
Sumangsango ni Dela Rosa iti warrant of arrest manipud International Criminal Court seknan iti maipagarop a crimes against humanity iti kampanya kontra droga ti administrasyon ni sigud a presidente Rodrigo Duterte.
