LA UNION – Mailayon iti pannakaipasidong ti San Fernando City, La Union iti General Community Quarantine with Some Restrictions agingga Agosto 6, 2021 maiyannurot iti Executive Order 120-2021.
Daytoy ket kalpasan a nagpason iti Executive Order No. 30 Series of 2021 nga impaulog ni Provincial Governor Francisco Emmanuel R. Ortega III idi July 7, 2021 a nangipasidong iti
14 nga aldaw a GCQ iti syudad, manipud July 9 ken nagpatingga idi kalman, July 22, 2021.
Iti extension ti GCQ status ditoy syudad ket napagnunumwan dagiti lokal nga opisyal a mangbukbukel iti local IATF iti naisayangkat a panagtataripnong dagitoy idi Hulyo 21.
Base iti report, idi July 21, 2021 ket nakita a nangato pay laeng dagiti aktibo a kaso ti COVID 19 a dumanon iti 277 manipud pakabuklan a bilang dagiti nakaptan ti sakit a 2,570 ditoy syudad.
Iti occupancy rate kadagiti isolation facilities ket 31.61% bayat nga iti recovery rate ket 86.81%.
Malaksid dayta, 40 pay a barangay ditoy syudad iti addaan ti active cases a dumanon iti pakabuklan a 67.89% kadagiti amin a barangay ditoy San Fernando City.
Gaputi dayta, tarigagay dagiti lokal nga opsiyal a lalo pay a maibaba iti Average Daily Attack Rate, Occupancy Rate kadagiti Isolation Facilities ken Hospitalization Rate ditoy syudad, ken tapno naan-anay a malapdan iti pangta ti mas makaakar a Delta variant ti COVID-19.
Gaputi napawaywayan a General Community Quarantine with Some Restrictions ditoy syudad, agtultuloy met a maipatungpal agingga Agosto 6, dagiti guidelines a nakailanad iti Executive Order No. 113–2021.
Maysa kadagiti nainget a maipawil kabayatan ti GCQ ket iti panaglako, panaggatang, ken panagkonsumo ti anyaman a klase ti arak ken panangsurot iti curfew hour.
Mainaig ti daytoy, nabilin iti amin a barangay officials ditoy syudad nga ipaka-ammo iti extension ti GCQ kadagiti amin a bumaranggay.
