LA UNION – Agpaso ita nga aldaw, Mayo 5, 2021 iti General Community Quarantine (GCQ) a naideklara iti uppat nga ili ditoy probinsiya a La Union.
Mangrugi inton bigat, Mayo 6, maibaban iti quarantine status idiay ili ti Agoo, Aringay, Naguilian, ken Tubao, La Union iti Modified General Community Quarantine (MGCQ) manipud iti agdama a GCQ.
Maiyannurot daytoy iti Executive Order No. 22, Series of 2021 a pinirmaan ni Gov. Francisco Emmanuel “Pacoy” Ortega III ken iti nagbalin a desisyon dagiti mangbukbukel ti Inter Agency Task Force for Emerging Infectious Diseases (IATF-EID).
Maipalagip nga idi Abril 20, nangipaulog ti PGLU iti EO No. 13 series of 2021, a mangipasidong kadagiti nadakamat nga ili iti GCQ manipud April 22 agingga ita nga aldaw May 5,2021.
Gapu daytoy iti panagngato ti kaso iti COVID 19 iti napal-palabas nga aldaw.
Nupay kasta, idi Mayo 3 kas nakailanad iti EO No. 22, nakita iti panagbaba iti kaso ti COVID 19 ken nagbalin laengen a moderate risk level.
Iti panangibaba ti quarantine status ket naikonsulta nga umuna iti mangidadaulo kadagiti nasao a local government unit (LGUs) sakbay nga agipektibo ti nalag-lag-an nga MGCQ inton bigat.
