LA UNION – Nauram ken naperdi iti sumagmamano a generator wenno water pumps ken dadduma pay nga arwaten ti gobyerno siyudad ti San Fernando, kalpasan a nauram iti General Service Office (GSO) nga adda iti sidong ti Office of the Mayor.
Napasamak ti insidente pasado alas 6:00 ti sardam, idi Agosto 30, 2022.
Maibasar iti inisyal a report, nakita iti napuskol nga asok manipud iti nasao nga opisina ken gaputa maipagarop nga adda iti kagawaan wenno arwaten a maibilbilang a flammable materials, isunga napartak a nagkayamkam ti apoy, a nakadadaelan dagiti nasao a water pump.
Dagus a nagresponde ti City Bureau of Fire Protection a kaabay laeng ti GSO office, ket maipagarop a nasebseban ti apoy iti uneg laeng ti sumagmamano a minuto.
Nupay kasta, saan pay nga ammo iti pakabuklan a danyos iti insidente.
Agtultuloy iti imbestigasyon dagiti otoridad tapno duktalen ti puon ken gapu iti timpuar nga uram iti GSO office.
Iti General Services Office (GSO), ket isuti responsable iti panang-mantinir iti janitorial, security, landscaping ken dadduma pay a related services iti amin a city government buildings ken daddduma a sanikua ti gobyerno siyudad ti San Fernando, La Union.
