LA UNION – Nakaro iti pannakadismaya ti Overseases Filipino Workers (OFWs) idiay Hong Kong nga agawid koma ditoy Pilipinas sakbay iti kaaldawan ti panagrambak iti Paskua gapu iti maipagarup a palpak a ticketing system ti Peya Travel Agency.
Iti pannakiuman ti Bombo Radyo kenni Marites Nuval a taga Bangar, La Union, OFW nga adda ita idiay Hong Kong, kinunana a maysa isuna kadagiti ginasut a Pilipino a naitantan iti panagawidna kalpasan a saan a nairaman ti naganna a nai-book iti nakatuding a panagluganna koma iti eroplano.
Inkagumaanna ti immakar iti sabali nga agency a gumatang iti ticket tapno makaawid laeng ditoy Pilipinas, ngem ag-divert ti flight-na idiay Cebu ken sadiay nga aglugan iti sabali manen nga eroplano nga agturong idiay Clark International Airport idiay Pampanga.
Iti istorya pay ni Nuval, adu kadagiti padana nga OFW iti saan a makaasiwd sakbay ti Paskua.
Adu kadagiti kakailyan iti dismayado gapu ta nalpas ton iti panagrambak ti Paskua sakbayda a makadinna iti pamilyada nga adda ditoy Pilipinas.
“Adukami a nataktak nga OFWs ditoy Hong Kong. Nagadu ti agrekreklamo iti agency. Dagiti dadduma, nalpas ton ti Paskua sakbayda a makaawid dito. Ngem, inton agsubliak ditoy, kiddawek met ti refund iti ticket-ko.” kinuna ni Nuval.
Kabayatanna, dupudop iti adu nga OFWs iti nasao nga agency tapno agkiddaw ti refund kadagiti nagatang a tickets.
Iti bukod a Facebook Page ti Peya Travel Agency ket agkidkiddaw dagitoy iti dispensar kadagiti Pilipino nga agawid koma ditoy Pilipinas ken inaklonda ti responsabilidad iti pannakataktak dagiti kliyenteda.
“Makakaasa po kayo na pinagsusumikapan naming gawan ng paraan sa abot ng aming makakaya na bawat isa ay maharap namin. Taos-pusong paumanhin po talaga.” sigun ti Peya Travel Agency. (Absalom Flores)
