Tampok ti La Union Agri-Trade Fair 2026 dagiti nabaduan a kalding iti “Pinaka MekMek” Goat Costume Parade kagiddan iti selebrasion ti 176th Founding Anniversary ti probinsya, ita nga aldaw, Pebrero 23, 2026 idiay Alejo R. Mabanag Building Grounds, City of San Fernando.
Imparang dagiti kawes ti kalding iti kultura, agrikultura, ken creativity ti Local Government Unit (LGU) a nagtaudanda.
Naikkan ti score dagiti kalding maibasar iti costume creativity, overall impact, cultural representation, ken audience appeal.
Panggep ti nasao a pasalip a maitandudo iti panagtaraken ti kalding, mapadur-as ti turismo, ken pannakipaset ti komunidad kadagiti aktibidad ti Agri-Trade Fair.
Segun kadagiti organizers, ti “Pinaka MekMek” Goat Costume Parade ti maysa kadagiti makapagagar a tampok ti selebrasion ta ipakpakitana iti panagtipon ti agrikultura ken arts, kasta met ti aktibo a pannakipaset dagiti LGUs iti panangitandudo ti lokal a produksion ken tradision.
Kabayatanna, tinawen a paset ti La Union Agri-Trade Fair iti founding anniversary celebration ti probinsia a panggepna nga ipakita dagiti produkto ti agrikultura, livestock innovations, ken talento dagiti Elyucano.###
