LA UNION – Pormal nga inyanunsiyo ni Governor Francisco Emmanuel “Pacoy” Ortega a COVID-free itan ti La Union.
Daytoy ket kalpasan a kinumpirma ti DOH-Region 1 a nakarwaren iti Ilocos Training and Regional Medical Center (ITRMC) dagiti dua a sigud a COVID 19 patient ken naudi a recoveries ti nasao a sakit ditoy probinsiya.
Base iti kauddian a COVID 19 monitoring report, 17 iti total recoveries ditoy La Union manipud iti 21 confirmed cases, bayat nga uppat iti natay gapwanan ti coronavirus.
Nupay kasta, nagpanawagan ti Provincial Government of La Union nga itultuloy nga aramiden itan a “new normal” dagiti napintas a nasuro ken annuruten iti napalabas nga ECQ ken GCQ.
Malaksid iti panagsuot ti face mask, social distancing, ken panagdaldalus iti bagi, napateg metten iti panagbiag ita iti saan unay a panagruar.
Rumuar laeng iti balay nu napateg iti gagara…Dagiti nasao nga addang ket makatulong tapno maliklikan ti coronavirus disease.
Kabayatanna, adda pay laeng iti tallo nga active cases ti COVID-19 iti rehiyon uno, nga amin ket manipud Pangasinan.
Agtaltalinaed nga 64 dagiti kumpirmado a kaso, 49 dagiti recoveries ken 12 dagiti natay iti COVID-19 iti sapasap a Region One.
