Impasigurado ni Executive Secretary Ralph Recto a ti gobierno ket agtultuloy a mangipaay ti bagas kadagiti marigrigat a pamilia kas paset iti panggep ni Presidente Ferdinand Marcos Jr. a masigurado nga awan ti mabisinan a Pilipino.
Kabayatan iti panagbisita idiay Oriental Mindoro, indauluan ni Recto iti pannakaiwaras ti bagas kadagiti 55,000 a pamilia iti sidong ti Bagong Pilipinas Rice Program.
Segun kenni Recto, agarup pito a milion a pamilia iti intero a pagilian ti nabenepisiaran iti nasao a programa.
Kenunana pay a malaksid iti panangtulong kadagiti marigrigat a pamilia, gumatgatang pay ti gobierno ti bagas manipud kadagiti lokal a mannalon tapno manayunan ti matgedanda ken mapadur-as iti sektor ti agrikultura.
Babaen ti programa a pinunduan ti Local Government Support Fund (LGSF), umaw-awat iti tunggal benepisiario ti 10 a kilo a bagas, bayat nga imatmatonan dagiti lokal a gobierno iti pannakaiwaras babaen ti panangusar ti database-da tapno masigurado a madanon dagiti kualipikado a pamilia.
Impasigurado pay ni Recto a mabalin a manayunan ti pondo ti LGSF no agtultuloy iti naannayas a pannakaipatungpal ti programa.
Kabayatanna, nagyaman ni Oriental Mindoro Gov. Humerlito Dolor iti agtultuloy a suporta ti gobierno nasional kadagiti mannalon ken ti pannakapapigsa ti seguridad ti taraon iti probinsia.###
