LA UNION– Nangideklara ti “ceasefire” ni La Union Governor Francisco Emmanuel “Pacoy” Ortega III iti kalkalpas nga eleksiyon ditoy siyudad ti San Fernando.
Iti panagbetla na kabayatan ti naisayangkat a ceremonial proclamation idi kalman iti city hall ti San Fernando, kinuna na a nalpasen ti eleksiyon ket anyaman iti nagbalin a resulta daytoy, nasken a respetaren.
Iti panangideklara ni Ortega ti ceasefire iti balubal ti pulitika ket kaipapanan iti panagkaykaysa tapno saan a masina-sina dagiti tattao ditoy siyudad.
Tarigagay na nga agtultuloy ti panagdur-as iti siyudad babaen kadagiti napipintas a programa ken proyekto, iti sidong ti panangimaton ni Mayor Dong Gualberto.
Saan met a nalipatan ni Gov. Ortega a pagyamanan dagiti supporters daytoy a nangbayabay ken nangital-o kenkuana sipud rugi agingga nalpas ti eleksiyon.
Maipalagip a naabak ni Gov. Ortega iti laban da kenni incumbent Mayor Gualberto, iti kina-mayor ditoy siyudad, babaen iti 838 votes.
Nakagun-od ni Gualberto iti pakabuklan a 33,284 votes idinto a 32,446 votes kenni Ortega.
Daytoyen iti maikatlo ken maudi a termino ni Gualberto kas mayor ditoy San Fernando City, La Union.
