Impaganetget ti sigud a Commission on Audit (COA) Commissioner a ni Heidi Mendoza ti pagkasapulan ti tunggal ahensya ti gobierno a maaddaan iti umdas a bileg para ti panagbantay kadagiti Statements of Assets, Liabilities, and Net Worth (SALNs) dagiti empleyado da.
Nupay kasta, kinunana a kalpasan a makolekta ti opisina dagiti SALN ket awanen ti nalawag nga “instruction” nu rumbeng a bantayan wenno i-monitor dagitoy isu nga arig na nakatambak laeng dagiti dokumento.
Segun kenni Mendoza, nasken ket maaddaanen iti bileg dagiti ahensya ti gobierno a bantayan ken rumbeng a ti maiyannatop nga opisina ket mangisayangkat iti trend analysis kadagiti baknang ti empleyado.
Babaen ti kastoy a wagas ket makita dagiti nagdoble wenno kellat a dimmakkel iti baknangda.
Mabalin kunana a ti lebel paylaeng dagiti ahensya ti gobierno ket maaddaan dan iti police power tapno pagsungbaten dagiti empleyado a napalaos a bimmaknang nu idasig iti salary grade da.
Innayon na pay a daitoy ket responsibilidad met a talaga ti lokal a gobierno dagiti amin nga empleyado ken opisyal a masakopan da.
