LA UNION – Natayen idi a maiturong iti ospital ti maysa a 20-anyos a college student kalpasan a matirwan daytoy iti kimat idiay ili ti Bangar, La Union.
Nabigbig ti biktima a ni Adrian Hidalgo, residente ti Barangay Alzate ti nasao nga ili.
Nammuan ti Bombo Radyo manipud iti Bangar Police Station, nagbuggo iti imana ti biktima iti payas kalpasan a nangruot para iti tarakenna a baka idi a makimat daytoy.
Sigun met iti ina ti nadakamat nga estiyudante a ni Edna Hidalgo, nakaugalianen ti anakna a mangruot tapno ipakan iti tarakenna nga ayop kalpasan a naggapu daytoy manipud ti pagadalan.
Aglippas koman iti panagadal ti biktima iti kurso nga AB Social Sciences idiay Ilocos Sur Polytechnic State College, idi probinsya ti Ilocos Sur.
Inladawanna pay a nagaget ken nasingpet ti natayen nga anakna.
Kalpasan a makapagturpos ti kolehiyo, tarigagay met ti ubing nga Hidalgo a makastrek iti Philippine Military Academy ken agbalin a maysa a suldado. (Abs Flores)
