Inwaragawag ti administrayon ni US President Donald Trump ita a ngudo ti lawas nga adda iti dakkel a panagbalbaliw iti immigration policy ti Estados Unidos.
Babaen iti baro nga allagaden, dagiti addaan ti temporary visa nga ag-apply ti green card ket kasapulan nga agsubli kadagiti pagilian da tapno dumalan ti consular processing kadagiti embahada wenno konsulado.
Sakbayna ket mapalpalubosan ti Adjustment of Status idiay uneg ti Estados Unidos, nangruna para kadagiti assawa ken annak dagiti U.S. citizens.
Kadaitoy a baro a sistema ket agbalinen a limitado kadagiti kaso ti “extraordinary circumstances” wenno nu adda iti dakkel a benepisyo ti ekonomiya ti pagilian, segun metlaeng iti U.S. Citizenship and Immigration Services (USCIS).
Mapatta-patta a nasurok maysa a milyo nga aplikante ti maapektaran ti nasao a panagbalbaliw.
Nainget a kinontra dagiti immigrant advocates ken sumagmamano a mamanday-linteg ti addang gapo iti posible a pannakaisina-sina dagiti pamilya ken kanayunan a taktak iti proseso.
Kabayatanna, nairanta iti polisiya a pagbalinen nga strikto iti proseso ti Permanent Residency ken baliwan ti daan a sistema iti immigration idiay Estados Unidos.
