BR LA UNION – Inyanunsyo ti Trump administration ita a weekend ti dakkel a pagbaliwan iti immigration policy ti Estados Unidos.
Iti sidong ti baro nga allagaden, dagiti indibidwal nga addaan ti temporary visas a kayatna ti ag-apply ti green card ket kasapolan nga agsubli pay laeng iti nagtaudanna a pagilian tapno dumalan iti consular processing.
Ti sigud ket mapalubosan dagiti aplikante nga agsumite ti adjustment of status bayat nga adda dan iti uneg ti U.S., nangruna iti asawa dagiti U.S. citizens ken annak.
Ngem iti baro a sistema, iti aplikasyon ket dumalanen iti embahada wenno konsulado ti U.S. iti ruar ti pagilian.
Mapatta-patta a maaapektaran ti nasurok maysa a milyon nga aplikante nga agdama nga agur-uray ti green card.
Segun iti U.S. Citizenship and Immigration Services (USCIS), iti laeng “extraordinary circumstances” wenno adda dakkel nga economic benefit iti U.S. a maipalubos ti adjustment of status iti uneg ti nasao a pagilian.
Iti pakabuklan, ti baro a polisiya ket nairanta nga irutan iti proseso ti permanent residency ken baliwan ti nabayagen a sistema ti immigration idiay Amerika.
