Naharang ken inarestar manen dagiti militar ti Israel ti grupo ti nalatak nga environmental activist a ni Greta Thunberg a sakay ti flotilla a mangipatulod kuma ti humanitarian aid idiay Gaza.
Segun iti Israeli Foreign Ministry, sumagmamano kadagiti barko a paset ti Global Sumud Flotilla (GSF) iti pinasardeng ken inturong dagiti militar dagiti tripulante na idiay kosta ti Israel.
Maipalagip nga immunan a nagballaag ti Israeli Navy kadagiti barko a sabalian ti direksiyon da bayat nga umun-uneg dagitoy iti radius ti active combat zone.
Aganay 30 a bangka iti nagtalinaed ti panaglayag da agturong idiay Gaza ken aganay 46 nautical miles ti kaadayo dan manipud iti nakatuding a destinasyon.
Inawagan ti grupo ni Thunberg ti panagharang kas ilegal ken saan a pangdepensa nu ketdi nalatak nga aramid a nagtaud iti desperasyon.
Impaganetget ti grupo a maysa kadagiti bangka da ket inggagara pay a dungparen ken tamaan ti water cannons ti Israel. Imbatad da pay a naharang iti civilian mission da agsipud ta ti naballigi a pannakaipatulod ti humanitarian aid ket pakaibatugan laeng a napaay iti panagsakop ti Israel.
Segun met iti Foreign Ministry ti Israel, ipadeport da pasubli idiay Europe da Thunberg ken ti kakadwa na.
Idi laeng Hunyo ti agdama a tawen ket naipadeport manen ni Thunberg, maysa nga aldaw kalpasan a maharang isuna ken dagiti 11 a dadduma pay babaen kadagiti puersa ti Israel gapo iti panaggandat a makaipatulod ti tulong idiay Gaza.
