Binabalaw ni Senadora Risa Hontiveros ti Government Service Insurance System (GSIS) kalpasan nga agpuonan daitoy ti nasurok ₱1B iti nalatak nga online gambling platform a DigiPlus.
Manipud iti privilege speech idiay plenaryo ti Senado, impaganetget ti senadora nga insugal ti ahensya ti masakbayan ti nasurok 2.7M a miembro na. Daitoy ket laksid iti nainget a panagkontra ti gobierno iti e-sabong ken dadduma pay a klase ti sugal online.
Inpaganetget ni Hontiveros a nu maiparit kadagiti empleyado ti gobierno ti agsugal kadagiti casino, apay garud ta intupil ti GSIS ti kwarta a binulan a tintinnagan dagiti miembro na? Arig na agparparang kunana nga adda iti maulit-ulit a pattern iti kinaliway ken kuwestiyonable a desisyon ti panagpuonan iti GSIS.
Imbutaktak pay ni Hontiveros a karaman kadagiti “high-risk” investments ti GSIS ket ti ₱1.45B subscription deal ti Alternergy Holdings Corporation, a sinerrek da nga awan iti panangaprobar ti GSIS Board ken endorsement manipud kadagiti risk oversight committees.
Segun iti Annual Audit Report ti Commission on Audit idi tawen 2023, nagpuonan ti GSIS ti agingga ₱2.38B kadagiti tallo a kompanya nga awanan ti proven track record ti biruk wenno dividend payout — direkta a mailabsing iti GSIS Act.
Maysa pay kadagitoy ti investment iti Del Monte Pacific nga adda pakabuklan utang a $2.3B ken ₱19.1M paper loss iti biang ti GSIS.
Dagitoy a panagpuonan ket agdagup ti ₱251.37M valuation loss — gatad a pangta iti actuarial solvency ti pondo ti ahensya.
Gapo iti daitoy ket nagpanawagan ni Hontiveros idiay Senado a repasuen ti GSIS Law mainaig kadagiti investments gapo metten iti nailista a nagsasaruno nga anomaliya nu kasta ket nalawag a mailatag dagiti guardrails a mangsalaknib ti pondo dagiti kameng ti gobierno.
