Dumanonen iti 16 a tattao ti bilang dagiti natay iti maikadua nga aldaw a gyera ti nagbatan ti Thailand ken Cambodia kasta met dagiti rinibu a residente a nabakwit agturong kadagiti evacuation centers manipud iti beddeng dagiti dua a pagilian.
Awan iti senyales iti panagsardeng iti gyera ken nagpakdaar pay iti Thailand a kumarkaro pay daitoy a rinnupak da ti Cambodia kadagiti sumaganad nga aldaw.
Immuna a nagrinnaut dagiti dua a pagilian idi aldaw ti Huebes, Hulyo 24 kalpasan iti opensiba ti Cambodia usar dagiti nagpada nga light and heavy weaponry a rason tapno mangibales met iti Thai Royal Army iti artillery fire.
Napasamak iti gyera idiay Ubon Ratchathani province kas maibasar iti impormasyon nga inbinglay iti Thai Army. Nagballag pay iti militar da kadagiti umili a Thai a liklikan dagiti lugar a nangisayangkatan ti panagraut usar ti heavy weapons ken rockets manipud Cambodia.
Nangmarka met daitoy iti dramatiko a panagkaro iti tensiyon dagiti dua a pagilian nga addaan iti 800 a kilometro a mapagsusupiatan a beddeng.
Daitoy a border dispute dagiti dua a pagilian ket nagtaud iti 1907 a mapa nga iti French colonial rule a naaramat tapno isina iti Cambodia manipud Thailand.
Inaramat iti Cambodia ti nasao a mapa kas basaran iti kukua da a teritoryo, banag a saan a binigbig iti Thailand gapo iti panagbiddut iti linya.
Kabayatanna sumagmamano metten a pagilian iti nangpadas a manganawa iti gyera ti Thailand ken Cambodia, pakairamanan ti Estados Unidos, China, Australia, ken dagiti pagilian iti Association of Southeast Asian Nations (ASEAN), agraman Pilipinas.
