LA UNION – Plan-planwen ita ti Department of Tourism (DoT)-Regional Office One iti mangisayangkat ti seminar and orientation kadagiti hotels and restaurant idiay ili ti San Juan, La Union maipapan iti panagluto ken umno a panagidasar iti “halal foods.”
Kinuna iti Bombo Radyo ni Tourism Region One Spokesperson Evangeline Dadat, plano da nga ipatungpal iti seminar-orientation maipapan iti panagluto ken panagisagana ti “halal food” inton bulan ti Setyembre, sumagmamano a lawas sakbay a mangrugi iti SEA Games a maisayangkat ditoy pagilian.
Namnamaen ngamin ti DoT, nga adda dagiti bisita nga aggapo iti muslim countries iti southeast asia, isunga kasapolan a maisuro kadagiti food handlers iti umno a panagsagana ti “halal foods.”
Iti halal food ket tawag iti taraon a karne dagiti muslim, a naparti iti umno a proseso maiyannurot iti Islamic law.
Immunan nga imbaga iti Bombo Radyo La Union ni Provincial Information and Tourism Office head Adamor Dagang, a mapatta-patta a 300 nga atleta ken coaches iti muslim countries, iti sumangbay ditoy probinsiya kas maysa kadagiti venue ti SEA Games partikular iti surfing competition.
Iti Pilipinas ti ag-host iti maika-30 a SEA Games a maisayangkat inton November 30-December 11, 2019.
