LA UNION -Napalaos ti ragsak ti maysa a Japanese educator kalpasan a personal a makitana dagiti mangmangngeganna a radio announcers ti Bombo Radyo Philippines.
Bimmista ni Makoto Sugi, associate professor ti Department of Intercultural Studies, Miyagi Gakuin Women’s University idiay Japan iti istasyon ti Bombo Radyo La Union gaputa panggepna nga agbalin daytoy a paset ti panagsukimat nga isaysayangkatna.
Kinunana ni Sugi a tallo tawenen ti naglabas idi aksidente nangngegna iti internet ti live streaming ti Bombo Radyo, aganay maysa tawen itan nga agtultuloy ti regular a panagdengngeg na iti programa ken drama ti network.
Partikular a padpadaananna iti inaldaw ket ti programa Bombo Hanay sa Pangaldaw (Tanghali) ti Bombo Radyo La Union.
Ni Sugi ket sigud a nagnaed ditoy Pilipinas idi 1992 agingga 1994 idi nagaramid ti research idiay probinsya ti Abra, ken nagadal ti Ilokano idiay Maynila ngem saanna unay a naaramat.
Nanayunan ti Iloko words nga ammo daytoy idi kanayun nga agdengngeg ti Bombo Radyo.
