Nakailista ti “very unhealthy” agingga “acutely unhealthy” a kalidad ti angin iti sumagmamano a paset ti Metro Manila ita nga aldaw, Septiembre 1, gapu iti haze a posible nga adda pakainaiganna iti agtultuloy nga uram idiay Kalimantan, Indonesia, segun ti Department of Environment and Natural Resources–Environmental Management Bureau (DENR-EMB).
Segun ti DENR-EMB, mabalin a naiyangin agturong ditoy Pilipinas iti asok ken transboundary haze manipud kadagiti uram idiay Kalimantan. Malaksid idiay Metro Manila, naireport met nga adda ti haze kadagiti sumagmamano a paset ti CALABARZON ken MIMAROPA. Agtultuloy nga imonmonitor ti ahensia iti air quality tapno maammuan iti kinalawa ken posible nga epekto daytoy.
Iti monitoring ti EMB-NCR, Parañaque City iti nakailista ti kangatuan nga Air Quality Index (AQI) a 296, nga adda iti kategoria nga “acutely unhealthy.” Adda iti kapada a kategoria met iti Las Piñas City nga addaan ti AQI a 237 maibasar iti monitoring itay bigat.
Kabayatanna, adda iti “very unhealthy” a lebel iti kalidad ti angin idiay Quezon City, Malabon, Mandaluyong, Manila, Marikina, Muntinlupa, Pasay, San Juan, Taguig, ken Valenzuela. Iti kastoy a lebel, nangatngato iti peggad ti dakes nga epekto iti salun-at partikular kadagiti sensitibo nga indibidual.
Mainaig ditoy, imbalakad ti DENR-EMB iti publiko a limitaran iti nabayag a panagtalinaed iti ruar, kangrunaan kadagiti lugar a kadkadlaw nga apektado ti haze. Nairekomenda met iti panagusar ti well-fitting face mask, partikular iti N95 wenno ti kapada daytoy, no kasapulan a rummuar.
Partikular a mabalbalakadan dagiti ubbing, senior citizen, masikog, ken dagiti addaan ti sakit iti bara wenno puso a kissayan iti outdoor exposure ken mangiyusuat ti kanayunan a panagannad.
Kabayatanna, nangiruar metten ti Air Quality Advisory iti Quezon City government ken binalakadan dagiti residente nga agsuot ti face mask ken no mabalbalin ket agtalinaed iti uneg ti balay.
Agtultuloy iti panangallukoy dagiti otoridad iti publiko a subaybayan dagiti opisial nga opisial nga abiso maipapan iti kalidad ti angin bayat nga agtultuloy iti monitoring iti epekto ti haze.###
