LA UNION – Adda pay laeng iti safe level dagiti pangpubliko ken pribado nga ospital ditoy Region One, kangrunaan na dagiti nga agserserbi nga isolation facility para kadagiti COVID patients.
Daytoy ti pinatalgedan iti Bombo Radyo La Union ni Dr. Rhuel Bobis, Medical Officer 4 ti DOH Region 1, kas maibasar iti monitoring nga isay-sayangkat da kadagiti health care facilities iti intero a rehiyon.
Kinuna na nga less than 30% iti occupancy rate kadagiti ICU, ward, ken dagiti maus-usar a ventilators iti naduma-duma nga ospital.
Kayatna sawen, saan a mapunpunno iti covid patients dagiti nadesignaran nga isolation facility.
Ngem nupay napintas kunana a datus daytoy, saan da nga agkampante ket agtultuloy dagiti maiway-wayat nga addang tapno agtalinaed a manageable ti ahensiya iti kaso ti COVID ditoy Region One.
