LA UNION – Nagbalakad iti maysa a health educator seknan kadagiti rumbeng nga aramiden ita a panawen ti El Niño ken kumarkaru nga epekto ti tikag.
Iti pannakiuman ti Bombo Radyo La Union kenni Miguel Vargas, maysa a registered nurse ken health educator, kasapolan ken napateg iti ag-precaution ita a tiyempo ti tikag, tapno maliklikan iti naduma-duma a sakit a patauden iti nakaru a kinadagaang ti panawen.
Nangnangruna a binalakadanna dagiti nataengan ken agtutubo nga addaan ti sagubanit wenno an-annayen, a napateg nga ammo dagiti aramiden nu makapadas iti nakaru nga heat index.
Nu bilang kunana makapadas iti pannaka-ulaw wenno rikna a kasla matalimudaw, iti umuna nga aramiden ket uminom ti danum.
Napateg a kanayon a hydrated ti bagi tapno masalakniban kontra iti nakaru nga heat index.
Liklikan ti rimuar kadagiti oras a nakaru iti darang ti init, manipud alas 9:00 ti agsapa agingga alas 3:00 ti malem.
Agsuot laeng kadagiti light colored and naingpis a lupot, agusar ti payong, kallugong, ken eyeglasses tunggal rumuar iti pagtaengan.
