Nangisayangkat ti Balaoan District Hospital (BLDH) ken Bacnotan District Hospital (BDH) dagiti aktibidad a mainaig iti salun-at kas suporta iti pannakaitandudo ti respiratory health ken nasalun-at nga estilo ti panagbiag.
Iti panangidaulo ti Tobacco Smoking Cessation and Control Committee ti BDH, naisayangkat ti Tobacco Cessation Counselling para kadagiti empleado ti ospital idi Hulio 11 ken 19, 2026 iti BDH Conference Room. Panggep ti programa a paregtaen dagiti staff nga in-inut nga isardeng iti agsigarilio ken panagusar iti dadduma pay a tobacco products.
Kabayatanna, nangisayangkat ti Outpatient Department (OPD) ti BLDH kadagiti health education lectures idi Hunio 30, 2026 kas paset iti selebrasion ti National No Smoking Month. Natalantan iti aktibidad dagiti dakes nga epekto ti panagsigarilio ken vaping iti salun-at ken pinaregta dagiti pasiente ken ti pamiliada nga aramiden ti smoke-free lifestyle tapno makatulong a manglapped kadagiti chronic disease.
Napagsasaritaan pay kadagiti health lectures iti kinapateg ti boluntario a panagdonar ti dara ken organs ken iti akem daytoy iti pannakaispal ti biag. Adda met diskusion maipapan iti pangta ti panagusar ti illegal a droga, panangliklik iti substance abuse, ken ti kinapateg ti panangaramid kadagiti nasirib ken addaan kaipapanan a pangngeddeng para iti natalged ken nasalun-at a panagbiag.
Segun kadagiti ospital, panggep dagiti aktibidad a palawaen iti pannakaammo ti publiko ken mangipaay iti maitutop nga interventions tapno maitandudo ti salun-at ken pagimbagan ti komunidad.###
