Inyebkas ni Carla Guevara Laforteza, ina ti lider ti KATSEYE a ni Sophia, ti suporta iti desision ti anakna nga aginana pay laeng manipud iti grupo para iti personal a salun-at ken pagimbagan.
Impadamag ti HYBE ken Geffen Records a saan a sumurot ni Sophia iti European ken United Kingdom stops ti “The Wild World Tour” ita a Setiembre, kalpasan a nag-hiatus daytoy iti umuna a paset ti Agosto.
Segun kenni Carla, kasapulan ni Sophia ti umdas a panaginana gapu iti pannakabannog iti trabaho, ken napateg nga asikasuen iti bagina ken ti pagimbagan ti panunot daytoy sakbay nga agsubli iti grupo.
Ni Sophia iti maikadua a miembro ti KATSEYE a temporario a naginana kasaruno ni Manon. Innayon ni Carla a saanna a pilpiliten ti anakna a pagsaritaan iti panagsubli daytoy ken baybay-an nga agdesision para iti bagina.
Kabayatanna, nakatuding nga agarte ni Carla kas Mother iti “The Notebook: The Musical,” a mangrugi manipud Setiembre 3 agingga 20 iti Samsung Performing Arts Theatre idiay Circuit Makati.###
