LA UNION – Kaadwan kadagiti pito a baro a kaso ti COVID 19 a nailista ditoy syudad ti San Fernando ket naala da ti virus gaputi history of exposure.
Daytoy iti imbatad kabayatan iti interview ti Bombo Radyo La Union kenni Dr. Arman Carrera, city health officer ditoy syudad.
Kinuna na a dagiti nasao a pasyente ket agtawen ti 20 agingga 40, ken dagitoy iti masansan kunana a rumuar iti babbalay da.
Ngem dagus a pinunas ni Dr. Carrera iti panagdanag dagiti umili, agsipudta dagiti pito a pasyente ket dagus a naiturong iti isolation facility, tapno ma-contain iti virus ken saan a maakaran iti dadduma.
Nagtignay metten kunana dagiti contact tracers ti syudad ken binalakadan da dagiti pamilya a nakapolapol dagiti pasyente nga ag-home quarantine wenno agtalinaed laeng iti uneg ti bababbalay dagitoy.
Inulit manen ni Dr. Carrera dagiti basic health protocols tapno malabanan iti sakit a COVID 19, kas koma iti panagsuot ti face mask, social distancing, ken panangdalus/panagbuggo ti ima.
Kinuna na nga iti syudad ti San Fernando ket addaan ti 59 contact tracers.
Iti agdama, iti syudad ti San Fernando ket nakailistan ti 271 confirmed cases ti COVID 19 bayat a 29 iti aktibo a kaso ken agtaltalinaed iti isolation facility.
