LA UNION – Nakaro iti pannakaliddaang ti maysa a hog raiser kalpasan a napukawan daytoy iti dakkel a kantidad a naglakuan iti baboy idiay ili ti Bacnotan, La Union.
Sigun ti nasao nga agtartaraken iti baboy a ni Orlando Buccat, residente ti Barangay Lacong, San Gabriel, La Union, i-remit na koman ti P190,000 cash a naglakuanna iti dengnguen idi a saanna a killaat a napukaw daytoy.
Kinuna ni Buccat, saanna a napuputan a naibatina iti rabaw ti hood ti manmanihuenna a lugan ti bag a naglaon iti kwarta.
Posible a natinnag iti batog ti maysa a fastfood chain idiay Bacnotan ti nadakamat a bag kalpasan nga immarangkada ti iggemna a behikulo.
Umap-apela ni Buccat, a no mapidot ti bag a naglaon iti kwarta ket maipulang kuma kenuana gapu ta saanna a kabaelan a sukatan daytoy ken makitartaraken laeng isuna iti baboy.
