LA UNION – Nakasagana manen nga agtaraken ti baboy dagiti backyard hog raisers idiay Barangay Cadaclan, San Fernando City, La Union kalpasan a naipasidong iti lockdown ken naideklara aground zero idi bulan ti Marso.
Iti nakalap nga impormasyon ti Bombo Radyo La Union manipud kenni Dr. Flosie P. Decena, city veterinian ti San Fernando, kinuna na a nangrugin dagiti
hog raisers nga agdalus ken i-disinfect iti lugar, nupay awanen ti kaso ti African Swine Fever (ASF).
Maipalagip a sakbay a naideklara iti luzonwide lockdown gaputi COVID-19 pandemic, naipasidongen iti lockdown ti Barangay Cadaclan ken naideklara pay a ground zero kalpasan a naserrek ti ASF a nangpatay iti aganay 30 a baboy ken 122 pay iti naipasidong iti culling idi umuna a lawas ti Marso.
Iti agdama, awan pay ti agtar-taraken ti baboy iti nasao a lugar ngem kinumpirma ni Dr. Decena nga ur-urayen da laengen ti certification nga aggapo iti DA Region-1 tapno mai-lift ti red mark agturong iti pink mark, a mangipasimudaag a natalgeden iti ASF iti Barangay Cadaclan.
Kabayatanna, kumidkiddaw ita ti kanayunan nga ayuda manipud DA Region 1, dagiti hog raisers idiay Barangay Cadaclan kalpasan a naipasidong amin iti culling dagiti taraken da a baboy tapno naan-anay a maparmek iti panagraira ti sakit a swine fever a pumatpatay kadagiti nasao a dingwen.
Maipalagip nga immunan a naipaayan ti tulong pinansiyal a sag-P1,500 manipud city ken provincial government ti La Union dagiti naapektaran a backyard hog raisers, malaksid laeng iti P5,000 a nagtaud iti Department of Agriculture, para iti tunggal baboy a nai-culling.
